Yangi yil arafasi — o‘tgan vaqtda amalga oshirilgan ishlar sarhisobi hamda kelgusi rejalarni tuzish uchun eng qulay payt. 2022 yil qay darajada samarali o‘tdi? Qanday loyihalar va tashabbuslar amalga oshirildi? Kelgusi 2023 yilda nimalar rejalashtirilmoqda?
Bugun “Navoiyuran” DK faollar zalida tashkil etilgan Yangi yil bayramiga bag‘ishlangan tadbirda shu va shu kabi boshqa qator masalalar borasida ma’lumot berildi. Tadbirda korxona rahbariyati, bo‘lim va xizmat boshliqlari, muhandis-texnik xodimlar ishtirok etdi.
Dastlab, korxona bosh direktori J.Xasanov ortda qolayotgan 2022 yil davomida erishilgan natijalar, kelgusidagi vazifalarga to‘xtalib o‘tdi.
Shuningdek, joriy yilning 20 dekabr kuni O‘zbekiston Respublikasi Prezidentining Oliy Majlisga va O‘zbekiston xalqiga navbatdagi murojaatnomasida belgilab berilgan vazifalar haqida ham ma’lumot berildi va korxonaning kelgusidagi faoliyatiga ulkan muvaffaqiyatlar tiladi hamda jamoani bayram bilan tabrikladi.
Ta’kidlanganidek, bu marralarga, bu yutuqlarga o‘z-o‘zidan erishilgani yo‘q. Buning zamirida tinimsiz va mashaqqatli mehnat, yurtga fidoyilik, kasbga sadoqat kabi yuksak insoniy fazilatlar mujassamdir.
Tadbirda "Yoshlik" madaniyat saroyi badiiy jamoalari tomonidan tayyorlangan teatrlashtirilgan bayram konsert dasturi hamda xonandalar ishtirokidagi sho‘x-shodon kuy-qo‘shiqlar barchaga ko‘tarinki kayfiyat bag‘ishladi.
"Navoiyuran" DK axborot xizmati
