Respublikamizdagi tabiiy uran ishlab chiqaruvchi yagona korxona bo‘lgan “Navoiyuran” davlat korxonasi tarkibida bugungi kunda “Zafarobod” kon boshqarmasi, “Uchquduq” va “Nurobod” ishlab chiqarish maydonlarida 6 ta geotexnologik konlar faoliyat yuritmoqda. Ularning har birining o‘ziga xos tarixi, bosib o‘tgan shonli va sharafli yo‘li bor. Samarqand viloyatining Nurobod tumani hududida joylashgan “Sobirsoy” geotexnologik koni ham ana shunday zalvorli tarixga ega konlardan hisoblanadi. Joriy yil uning 60 yilligi keng nishonlanmoqda.
Necha asrlar davomida sukunatda, kimsasiz yastanib yotgan Qizilqum sahrosining beadoq kengliklari va bepoyon Ulus-Jom dashtliklari. Bu hududlarda hali hayot qaynab, qimmatbaho metallar qazib olinib, yirik sanoat korxonalari barpo etilishi hech kimning hayoliga ham kelmagan bir davrlar. O‘tgan asrning 50 yillariga kelib esa bu hayollar haqiqatga aylanib, olimlarning ilmiy-tadqiqot hamda geologiya-qidiruv ishlari o‘z samarasini berdi. Natijada ushbu hududlarda ilk bora katta yer osti boyligi – uran zahirasi borligi aniqlandi. Keyinchalik, izlanishlar ko‘lami kengayib, Samarqand, Jizzax va Buxoro viloyatlari hududiga ham ko‘chdi. Xususan, bundan 60 yil avval, ya’ni 1964 yilda Ulus-Jom dashtu-adirlarida aniqlangan tabiiy uran zaxiralarini o‘zlashtirish maqsadida Samarqand viloyati Nurobod tumanida “Sobirsoy” koni tashkil etilgan edi. Mazkur kon “Sharq”, “Agron”, “Nurbuloq”, “Ulus” kabi kichik uran konlarini o‘zida birlashtirdi. 60 yil – bu shonli ishchilar an’analarini shakllantirgan, bir necha avlod taqdirini o‘z ichiga olgan butun bir tarix demakdir. Bu yerda haqiqiy ishlab chiqarish, muhandislik izlanishlar maktabi va eng asosiysi fidokor, o‘z ishiga sodiq bo‘lgan korxona ishchilar jamoasi shakllandi. Bugungi kunda ushbu kon “Navoiyuran” davlat korxonasi “Nurobod” ishlab chiqarish maydoniga qarashli bo‘lib, korxonada uran ishlab chiqarishning 9,2 foizi, mazkur kon hisobiga to‘g‘ri keladi. Konda fidokorona mehnat qilayotgan 890 nafar burg‘ilovchi, geolog, geotexnolog, muhandis-texnik xodimlardan iborat jamoaning fidokorona mehnatlari ortidan 2030 yilga qadar geologiya-qidiruv ishlari orqali uran zaxiralarini 9150 tonnaga yetkazish rejalashtirilgan.
“Nurobod” ishlab chiqarish maydoni bugungi kunda o‘zining oldiga juda katta maqsadlarni reja qilib qo‘ygan. Bugun bu Davlatimiz Rahbarining “Navoiyuran” davlat korxonasi transformatsiyasini amalga oshirish bo‘yicha qo‘yilgan katta qadamlarning bir qismi sifatida bizning geotexnologik konlarimizda ham o‘z ifodasini topmoqda, - deydi “Sobirsoy” geotexnologik koni bosh muhandisi Jalol Arapov. Shu paytgacha “Jarquduq” dala maydonida geologiya-qidiruv ishlari olib borilgan bo‘lsa, hozirda bu jarayon “Ingichka”, “Sharqiy Ag‘ron” dala maydonlariga ko‘chib, konlar ishga tushurildi. Shuningdek, Jizzax viloyatining “Arnasoy” istiqbolli konini o‘zlashtirish ishlari boshlandi va hozirda tajriba-sanoat uchastkalarida tabiiy uran qazib olish bo‘yicha ishlar amalga oshirilmoqda. Korxonamiz geologlari tomonidan ushbu konlarda uranning juda katta zaxirasi mavjudligi bo‘yicha ma’lumotlar berilgan. Yana bir jihatni aytib o‘tish o‘rinli deb bilaman. O‘tgan yili “Sobirsoy” koni geotexnologik uchastkalarida 7 ta burg‘ilash qurilmalari ishlagan bo‘lsa, birgina joriy yilning o‘zida ularning soni 13 taga yetib, zamonaviy burg‘ilash qurilmalari bilan to‘ldirildi. Bu ishlab chiqarish hajmlarini yanada oshirishga, belgilangan rejalarni o‘z vaqtida uddalashga imkoniyatlarni kengaytirish bilan birga, hudud aholisini ish bilan ta’minlashda ham juda katta rol o‘ynaydi”.
Albatta bosib o‘tilgan zalvorli tarix bugun yorqin kelajakni ham yaratmoqda. Uni sarhisob qilish, istiqbolli rejalarni tuzish kelgusi ishlarga qanot bo‘ladi. Nurobod tumani markazidagi tantanalar maskanida mazkur konning 60 yilligiga bag‘ishlab o‘tkazilgan shodiyonada fidoyi ishchi-xodimlar sharaflandi, mehnat faxriylariga e’zoz va ehtirom ko‘ratildi.
Tantana avvalida “Navoiyuran” DK Bosh direktori Djamal Fayzullaevning jamoaga yo‘llagan bayram tabrigini Xodimlar bilan sihlash Departamenti direktori A.Oltinov o‘qib eshittirdi.
Shuningdek, shodiyonada ko‘p yillik fidokorona mehnati va ishlab chiqarishga qo‘shgan munosib hissasi hamda sana munosabati bilan bir guruh xodimlar "Korxona faxriysi" unvoni, "Konchilik shuhrati" ko‘krak nishoni hamda korxona rahbariyati va 6-son Birlashgan kasaba uyushmasi Qo‘mitasining faxriy yorliqlari va tashakkurnomalari bilan taqdirlandilar.
“1993 yilda Toshkent davlat texnika universitetini tamomlab, yosh mutaxassis sifatida Janubiy kon boshqarmasiga mexank bo‘lib ishga kelgandim. Mana 15 yildirki “Sobirsoy” geotexnologik konida bosh mexanik lavozimida ishlab kelmoqdaman. 30 yildan buyon shu sohaning ichidaman. Bu vaqt davomida ko‘plab ustozlar qo‘lida tajriba orttirdim, hozirda o‘zim ham o‘nlab shogirdlar tayyorladim, - deydi “Sobirsoy” geotexnologik koni bosh mexanigi, “Konchilik shuhrati” ko‘krak nishoni sohibi Umar Shodiev. Men uchun bu kon hayotimning bir qismi, mazmuni desam hech ham mubolag‘a bo‘lmaydi. Boisi, farzandlarim shu Nurobod zaminida tug‘ildi, turmush o‘rtog‘im ham konda mehnat faoliyatini olib bormoqda. Qisqa qilib aytganda hayotim shu kon bilan chambarchas bog‘lanib ketgan. Men jamoamdan, korxonamiz rahbariyatidan minnatdorman. Bugun “Konchilik shuhrati” ko‘krak nishoni bilan taqdirlashdi. Bu menga katta kuch-g‘ayrat beradi, yurtimiz taraqqiyoti va korxonamiz ravnaqi yo‘lida yanada jiddu-jahd ko‘rsatishga bir motivatsiya bo‘ladi. Men shunday korxonada ishlayotganimdan, konchi degan sharafli kasbning egasi ekanligimdan faxrlanaman. Barcha hamkasblarimga geotexnologik konimizning 60 yilligi muborak bo‘lsin deyman”.
Tadbirda Nurobod tumani hokimi S.Berdiqulov ham yig‘ilganlarni bayram bilan qutlab, jamoaga hududning ijtimoiy-iqtisodiy taraqqiyoti yo‘lida qilayotgan mehnatlari uchun o‘zining minnatdorchiligini bildirdi. Tantanali marosim "Farhod" va “Nurobod” madaniyat saroyi hamda "Yoshlik" madaniyat markazi badiiy jamoalari va xonandalari tomonidan tayyorlangan bayram konserti bilan davom etdi.
Shodiyona so‘nggida tashkil etilgan rang-barang mushakbozlik barchaga birdek bayram kayfiyatini ulashdi.
“Navoiyuran” DK axborot PR xizmati
