Ma’lumki, O‘zbekiston Respublikasi Prezidentining 2023-yil 16-fevraldagi “2023-yilda qayta tiklanuvchi energiya manbalarini va energiya tejovchi texnologiyalarni joriy etishni jadallashtirish chora-tadbirlari to‘g‘risida”gi hamda 2024-yil 14-iyundagi “Energiya resurslaridan foydalanish samaradorligini oshirish bo‘yicha qo‘shimcha chora-tadbirlar to‘g‘risida”gi qarorlari qabul qilingan.
Ushbu hujjatlarda sohadagi munosabatlarni yanada rivojlantirish va elektr energiyasi hamda tabiiy gazni tejash bo‘yicha maqsadli ko‘rsatkichlarning bajarilishini ta’minlash, aholi va tadbirkorlik sub’ektlarining elektr energiyasi hamda tabiiy gazdan samarali va tejamkor foydalanishi bo‘yicha zarur ishlarni amalga oshirish, quyosh panellari, quyosh suv kollektorlari o‘rnatish imkoniyati bor tadbirkorlik sub’ektlari hamda aholi xonadonlari uchun mazkur jihozlarning targ‘ibot-tashviqotini kuchaytirish singari vazifalar ko‘rsatib o‘tilgan.
Zafarobod qo‘rg‘onidagi “Yoshlik” madaniyat uyida qayta tiklanuvchi energiya manbalarining afzalliklari borasida o'tkazilgan targ‘ibot tadbirida bu haqda so'z yuritildi.
Unda “Navoiyuran” DK bosh energetik bo‘limi, Navoiy ixtisoslashtirilgan prokuraturasi, Konimex tumani gaz ta’minoti bo‘limi vakillari hamda “Zafarobod” KB bo‘linmalari va “NKMK Jamg‘armasi” DM Zafarobod hududiy boshqarmasi mehnat jamoalari va mahalliy aholi ishtirok etdi.
Uchrashuvda taqdimot o‘tkazgan “SUN-HIGHTECH” kompaniyasi vakili tomonidan “yashil” energiyaning iqtisodiy afzalliklari hamda quyosh elektr panellarini o‘rnatish, muqobil energiya qurilmalari uchun tijorat banklari tomonidan ajratiladigan kredit mablag‘lari haqida ham ma’lumotlar berildi.
Muloqotlar davomida kichik quyosh elektr stansiyalaridan foydalanish nafaqat butun sayyoramiz va yer yuzidagi ekologik vaziyatni yaxshilaydi, balki hozirgi iqtisodiy sharoitda pirovardida tadbirkorlar uchun ham, jismoniy shaxslar uchun ham foydali ekanligi ta’kidlandi.
Shuningdek, ushbu tashabbus O‘zbekiston hukumati tomonidan har tomonlama rag‘batlantirilishi, subsidiyalar ajratilishi, shaxsiy quyosh fotoelektr stansiyalarini (1 MVt gacha) o‘rnatish istagida bo‘lgan fuqarolar stansiyalarini yagona energetika tizimiga ulangan holda foydalanishlari hamda o‘z ehtiyojlaridan ortgan qismini hududiy elektr tarmoqlari korxonalariga yuqoridagi qarorlarga asosan shartnoma asosida sotishlari mumkinligi qayd etildi.
"Navoiyuran" DK axborot xizmati
